Beteja për rimarrjen e Rakas, bastioni i Shtetit Islamik (ISIS) në Siri, do të fillojë brenda pak ditësh, njoftoi sot një zëdhënës i aleancës anti ISIS, pas përparimeve në luftime.

Forcat Demokratike Siriane (FDS), një aleancë arabo-kurde e mbështetur nga SHBA-ja, po zhvillon që prej nëntorit një ofensivë për rimarrjen e rajonit të Rakasë nga kontrolli i ISIS-it.

Luftëtarët e saj morën dje në mbrëmje qytetin Al Mansura, rreth 20 kilometra në jugperëndim të Rakas, më pas arritën të marrin sot digën e Al Bath në Eufrat, që lidhet me qytetin, njoftoi Observatori Sirian i të Drejtave të Njeriut.

Falë këtyre përparimeve ata ndodhen vetëm disa kilomtera larg Rakas, që njihet si kryeqyteti i ISIS-it.

Ky koalicion mbështetet nga SHBA-ja nga ajri, me armatime dhe asistencë të ekspertëve ushtarakë në terren.